我地根據旅遊書o既指示,o係地鐵Lotto站落車,再邊行邊問,結果用左差唔多半個鐘至行到聖西路球場o既停車場,仲要圍住個場兜過大圈至去到Stadium Tour o既20號閘口。我地去到啱啱好5:00pm, 梗梗趕到最後一批Tour (10:00am-5:00pm),真係好彩,即磅位位€12.5入去啦!
我地先參觀球場,唔算好大,不過好高好多層,所以都坐到八萬五千人架!跟住我地經過球員家屬廂房(俾d家屬一齊睇波),去到A米同埋國米o既球員更衣室, A米o既更衣室以紅色為主色,國米o既就當然係以藍色為主色啦。不過佢地就冇好似阿仙奴同埋車路士o既更衣室咁樣,掛晒d球員著過o既落場波衫出黎喎…跟住個Tour就咁就完左啦,又冇得上上層參觀,又冇得睇球員通道同埋記者室,有d“昆水”喎…不過,仲可以參觀埋個Museum,有好多兩隊o既歷史相片同物品,球衣,獎杯等等,不過由於d職員等住收工,所以佢地好快就趕我地走,我地惟有走馬看花啦!
離開o既時候至發現球場門口有個電車站,架電車仲要經過感恩聖母教堂同埋大教堂附近添!早知黎果陣就唔駛行得咁辛苦啦!(記住係16號電車,車頭大大隻字寫住“SAN SIRO”,好易認架!)
No comments:
Post a Comment