2/4 – 5/4 羅馬 (3.5 days)

Day 1 倫敦 --(BA flight 0800/1135)--> 羅馬 (人骨教堂->許願池->西班牙廣場->名店街)
Day 2 羅馬 (圓形競技場->帕拉提諾之丘->古羅馬市場廢墟->威尼斯廣場->萬神殿)
Day 3 羅馬 (梵帝岡博物館->聖彼得廣場->聖彼得大教堂->聖天使城->奧林匹克足球場)
Day 4 羅馬 (聖喬凡尼教堂) --(Eurostar 1252/1429)--> 佛羅倫斯

Day 1一早由倫敦Gatwick坐BA飛去羅馬,一個鐘前去到機場,竟然因為overbook而俾人upgrade左去business class,仲要係第一行添!

坐business class感覺真係爽!個位闊到伸直隻腳都掂唔到牆,隨時可以起身跳下舞,個餐又好食,仲要係第一個落機添!如果香港去倫敦果程都可以upgrade就perfect啦…人生邊有咁完美呀…

今次我地住o既B&B叫做Maryelen B & B,€95/night,間房唔算好大,但算幾新淨整潔,勝在近火車站;因為向內園,所以夜晚超級靜;早餐在pantry食,超豐富;房東好健談好親切,朝朝早餐都同住客傾一大餐;所以都值得推介架!

今次我地都算去咗旅遊書介紹o既大部分旅遊點,由於係復活節o既關係,度度都好多人(個許願池仲嘈過街市),成日都要排隊,特別係梵蒂岡,個博物館同大教堂加埋都排左兩個幾鐘,排到傻左!團友仲因為o係空曠o既聖彼得廣場排左成粒鐘隊,結果凍親添!慘!


o係眾多旅遊點當中,要特別推介人骨教堂(又名骨骸寺),因為成個教堂內o既壁畫同天花畫都係用人骨切出黎o既!真係驚嚇!至於勁多人排隊o既梵蒂岡博物館同聖彼得大教堂都係不能錯過o既,我個人認為,去完梵蒂岡博物館之後,意大利其他要俾錢o既博物館都可以唔駛去啦! 聖喬凡尼教堂旁邊果條“耶穌受審時行過o既樓梯”都好特別,D教徒“一步一跪”真係好誠心。當然,去奧林匹克足球場睇歐聯就梗係“有今世,冇來世”啦!(詳情請睇“羅馬睇歐聯篇”)

食物方面,意大利o既野食真係冇得頂!基本上,求其入一間餐廳,食任何一款o既pizza, pasta, risotto同海鮮,都好鬼好食,連最簡單o既番茄pasta, 芝士pizza都好鬼正!價錢方面亦十分經濟,基本上兩個人食一個晚餐(pizza+pasta/risotto+hous wine+人頭費)都係大約€20-30。(特別係返到英國之後,真係好鬼掛住意大利o既美食呀!)

好多人都好驚意大利o既治安差,我地都唔例外,所以我地每次坐地鐵都“如臨大敵”,仲攪到我地唔敢坐巴士添!不過經過觀察,意大利o既治安並冇想像中咁差喎,我地坐左好多次極擠迫o既地鐵同巴士都冇見過小偷,我覺得只要提高警覺,問題應該唔大o既。

講開巴士,除非你係隻赤兔馬,可以“日行千里”,否則去到羅馬真係一定要坐巴士,既慳腳骨力又可以睇風景,否則真係會攰到嘔!(特別要記住架64號巴士,佢黎由Termini開去聖彼得大教堂附近,中間經過萬神殿同埋納佛那廣場,可以話係cover左大部份地鐵到唔到o既旅遊點。)另外, 羅馬o既巴士上面係冇巴士飛賣o既,要買飛就要o係街邊o既小賣亭買(有個“T”牌),然後上車打飛,否則就要坐“霸王車”啦…我地都坐過幾次…

總括黎講,羅馬係屬於羅馬帝國時期o既城市(佛羅倫斯屬於文藝復興時期,威尼斯屬於拜占庭帝國,米蘭則屬於現代,各有特色),成個城市就好似一個巨型o既羅馬帝國古蹟咁,係一個好值得一去o既城市。

二人EXPENSE SUMMARY
住宿: Maryelen B&B:€285 (3 nights)
交通: 羅馬Fiumicino Airport -> Termini Station(Leonardo Express):€11 * 2 = €22; 市內巴士&地鐵 ~€10
膳食: 午餐(3) ~€80; 晚餐(3) ~€90
參觀: 圓形競技場:€10 * 2 = €20; 梵帝岡博物館:€10 * 2 = €20
合共: ~€527

5/4 – 6/4 托斯卡尼Greve in Chianti (1 day)

Day 4 羅馬 --(Eurostar 1252/1429)--> 佛羅倫斯 (旅館放行李) --(SITA Bus 1530/1630)--> 托斯卡尼Greve in Chianti (Piazza Matteotti->La Cantine試酒館)
Day 5 托斯卡尼Greve in Chianti (小城堡->Verrazzano酒莊->步行至Greti巴士站) --(SITA Bus 1535/1620)--> 佛羅倫斯

當我plan緊意大利o既行程o既時候,一直都好想加入一D郊野o既元素,於是我就o係旅遊書堆中搜索,終於俾我搵到,托斯卡尼,係你喇!!

托斯卡尼係意大利中部o既一個省,全省大部分地方都係丘陵地,著名旅遊點包括浪漫城市佛羅倫斯,以酒莊著名o既姬燕蒂(Chianti),中世紀古城錫耶納(Siena),有個斜塔o既比薩(Piza),古塔之城San Gimignano等等。由於我同團友都想去酒莊參觀,而比薩就真係得一個斜塔咁大把,所以我地就取Chianti而捨Piza啦。

去Chianti最方便o既方法係o係佛羅倫斯坐SITA Bus去,由SMN火車站出站左邊o既SITA巴士站,坐藍色o既SITA巴士去Greve in Chianti (Chianti o既中心點),大約一個鐘就到啦!

今次我地住o既Farmhouse叫Antico Pastificio Ulisse Mariotti,房間佈置簡潔,位置又方便(近鎮中心廣場),€65唔包早餐,都ok架。

去Chianti o既戲肉就梗係參觀酒莊啦! 我地今次參觀o既酒莊叫Verrazzano,係民宿主人介紹o既。由Greve in Chianti坐私家車去酒莊,車程大約10分鐘。(架私家車係民宿主人幫手搵o野,街坊價20歐元,如果大家想遠足或者“軟足”o既話,都可以行上去o既,兩個鐘左右啦!)酒莊有兩種Tour,一種係10am-12am唔包午餐(€15),一種係11am-2pm包午餐(€42)。由於想試下托斯卡尼o既鄉土菜,所以我地揀左包午餐o既tour。

個Tour準時11am開始,我地個團大約有15人,除左我同團友之外,其他都係歐美遊客。首先由導遊介紹酒莊歷史同埋酒莊主人,跟住就介紹下釀酒o既過程,然後參觀釀酒o既大木桶同埋擺放酒莊珍藏o既酒窖,導遊仲乘機sell下酒莊o既產品添!參觀完之後,導遊就帶我地去酒莊o既餐廳試酒同埋食托斯卡尼o既鄉土菜。呢餐總共試左五款酒,包括四款紅酒同埋一款甜酒(甜酒加杏仁餅係絕配!);而鄉土菜亦好豐富,有地道火腿同煙肉、烤腸同烤排骨、鮮茄意粉同埋沙律,樣樣都好好食架!最攪笑係午餐期間餐廳派芝士,D鬼佬好似發左癲咁係咁添食,唔通紅酒加芝士真係咁正斗?我又唔多覺喎!飽食後,我地由酒莊行番落大路(約45分鐘到達最近o既Greti巴士站),沿途仲可以欣賞托斯卡尼o既美麗風景添!

除左參觀酒莊,Greve in Chianti呢個小鎮都好值得參觀架。去鎮中心o既三角型廣場,可以參觀賣托斯卡尼土特產o既小商店(其中有賣托斯卡尼“黑公雞logo”產品o既鋪頭)。另外小鎮內仲有一間叫Le Cantine o既試酒館,館內有超過一百種意大利紅酒俾人試飲,遊客只要買張儲值卡,然後插入酒樽上面o既卡槽,再按掣,D酒就自動從機器流出(€0.5-2.0,大約50cc),我地連張€10儲值卡都未用完,就已經wingwing地啦…

總括黎講,呢個小鎮+酒莊之旅十分好玩,如果有時間o既話,真係值得一去架!




二人EXPENSE SUMMARY
住宿: Antico Pastificio Ulisse Mariotti:€65 (1 night)
交通: 佛羅倫斯 <-> Greve in Chianti (SITA Bus):€3.1 * 2 * 2 = €12.4; Greve in Chianti -> Verrazzano酒莊 (私家車):€20
膳食: 晚餐(1) ~€25
參觀: Verrazzano Wine Tour (w/lunch):€42 * 2 = €84
合共: ~€206.4

6/4 – 8/4 佛羅倫斯 (1.5 days)

Day 5 Greti巴士站 --(SITA Bus 1535/1620)--> 佛羅倫斯 (米高安哲勞廣場)
Day 6 佛羅倫斯 (聖瑪利亞諾維拉教堂->聖羅倫素教堂->皮具市場->聖喬凡尼洗禮堂->大教堂->維奇奧宮->維奇奧橋->聖哥斯教堂->The Mall Outlet)
Day 7 佛羅倫斯 --(Eurostar 1237/1528)--> 威尼斯

佛羅倫斯係托斯卡尼省最大城市,位於羅馬、威尼斯同埋米蘭三個城市o既中間,亦係著名o既旅遊城市,所以順理成章成為我地意大利之旅o既其中一站。

今次我地住o既B&B叫做Maison de Charme,€94.5/night。由於要寄存行李,所以搵左間超近火車站o既B&amp;amp;amp;B(行1分鐘就到!)。房間算新淨整潔;夜晚都算靜,偶然有車d聲啦;早餐o係房內食,都算豐富架。

如果要用一個字黎形容佛羅倫斯,我會用個“細”字!基本上除左米高安哲勞廣場之外,其他o既旅遊點可以3-4個鐘內用對腳行晒(唔計入館逐幅畫慢慢睇o既時間,亦唔計去outlet時間)。所以,除非你係超級名畫發燒友,否則佛羅倫斯係一日之內可以玩晒o既。

3-4個鐘內玩晒佛羅倫斯…唔信呢…基本上我地o既玩法係:門口影相,唔使入場費就入去參觀,然後就閃!原因係我地對d古董同埋名畫唔算好有興趣,而且我諗佛羅倫斯d古董同埋名畫都好難靚得過梵帝岡博物館(我地就係俾€5入左間唔知咩野紀念堂,10分鐘就出番黎,真係呻笨)。至於最出名o既玉翡翠藝術館,由於太多人排隊,我地竟然係好有共識地選擇過門而不入…d藝術野唔係我杯茶…我諗大家都明點解我地可以玩得咁快啦,哈哈!(P.S.我地係有俾€5入去聖哥斯教堂睇下d名人之墓o既,冇呻笨…)

至於米高安哲勞廣場,我地係o係火車站出去左手邊o既巴士站,坐12號巴士上去o既(落番黎都係坐12號)。米高安哲勞廣場最出名就係可以俯瞰佛羅倫斯全景,而我地亦都學d本地人,攤o係廣場o既梯級上面睇日落,攤左個幾鐘,好寫意。

另外,我地亦都去左佛羅倫斯附近o既outlet – The Mall。去到意大利,就梗係要去下outlet啦!至於點解揀呢個outlet?因為剩係識去呢個,剩係呢個有shuttle bus直達,其他就要揸車囉! 我地由SMN o既SITA巴士站坐15:30果班車,大約45分鐘就到啦。其實The Mall內o既鋪頭牌子都唔少架,例如Gucci,Burberry,Armani,Fendi,BV等等。我地o係The Mall行左大約兩個半鐘,都算有d收獲o既。最後我地坐19:00果班車返佛羅倫斯。(注意:去The Mall o既巴士一日得三班,而且班次有時會改,網上o既班次資料又唔準,所以去到佛羅倫斯最好先去巴士站攞定資料先)

食野方面,就梗係要試下中央市場外o既牛肚飽攤檔啦!位置係中央市場近皮具市場果邊o既corner位,紅色攤檔,入面有好多中文字o既comment,好易認架!味道真係好正,我地買完一個邊行邊食,之後都要返轉頭買多兩個當午餐!至於著名o既佛羅倫斯牛扒,由於聽講太過血淋淋,我地就無試過啦。


總括黎講,佛羅倫斯係一個好有文藝復興氣息o既城市,位置又方便,都值得花一日時間去遊覽o既。

二人EXPENSE SUMMARY
住宿: Maison de Charme,€94.5 * 2 = €189 (2 nights)
交通: 羅馬 -> 佛羅倫斯(Eurostar):€33 * 2 = €66; 佛羅倫斯 <--> The Mall (SITA Bus):€3.1 * 2 * 2 = €12.4
膳食: 午餐(1): €5(牛肚包兩個); 晚餐(2) ~€50
參觀: xx紀念堂:€5 * 2 = €10; 聖哥斯教堂:€5 * 2 = €10
合共: ~€372.4

8/4 – 10/4 威尼斯 (2 days)

Day 7 佛羅倫斯 --(Eurostar 1237/1528)--> 威尼斯 (黃金宮->雷雅托橋Rialto)
Day 8 威尼斯 (布拉諾島Burano->慕拉諾島Murano)
Day 9 威尼斯 (聖馬可廣場->聖馬可大教堂) --(Intercity 1252/1555)--> 米蘭

一行出火車站,已經覺得威尼斯好神奇: 冇車、冇馬路、建築物依水而建,大運河小運河o係廣場同埋建築物之間縱橫交錯,不愧為舉世聞名、獨一無二o既水都。由於冇車,只有果d行得好慢o既船仔,所以令人覺得好舒服,好悠閒。



今次我地住o既B&B叫做B & B Casanova ai Tolentini,€110/night。威尼斯o既住宿係全意大利最貴o既,間間B&B都至少€100一晚,可能因為係旺季啦。我地間B&B都算幾近火車站,十分鐘左右,不過如果攞住行李,行過d大橋小橋,上上落落,都幾辛苦架,所以如果再住遠d,就要幫襯水上的士啦。不過呢間B&B勝在旺中帶靜,位置方便得黎又唔係o係正由碼頭去Rialto/San Macro o既必經之路,所以唔係太多人經過,夜晚都算幾靜。至正都係個早餐,雖然只係簡單o既牛角包加咖啡,但係我地係o係樓下o既露天茶座,對住運河同埋小橋食,間中有小船行過,環境氣氛真係冇得頂!

係威尼斯其中一個必做o既活動,當然係遊船河啦!買一張水上巴士pass (€13/12 hrs, €15/24 hrs),就可以坐水上巴士,o係船上欣賞兩岸o既拜占庭古建築,同埋河上o既香蕉型貢多拉小艇,真寫意。我地睇見貢多拉上面o既遊客,o係船夫o既手風琴伴奏下,飲酒吹水,爽到暈!但係要有咁一流o既享受,代價不菲,淨係book船45分鐘都要成千蚊港紙(最多坐六人),仲唔計船夫奏樂o既費用添,所以我地真係唔捨得坐,惟有下次約埋班朋友至試下啦!由於景色實在太靚,我o係短短o既50分鐘船程(由火車站至聖馬可廣場),竟然影左超過100張相!好彩帶左張2G卡黎…

我地亦都參觀左岸上o既雷雅托橋同埋聖馬可廣場。雷雅托橋係一條個樣好似間屋o既拱橋,橋上有好多賣記念品o既鋪頭,好熱鬧,橋旁邊亦有街市同埋魚市場,買番d材料返香港整下意大利菜都可以架!至於聖馬可廣場,由於時間緊迫,我地只係o係個廣場上行下,o係聖馬可大教堂同埋總督宮門口影下相,同埋睇下條嘆息橋,惟有下次再黎過啦!

除左威尼斯本島之外,威尼斯o既外島-Burano, Murano同埋Lido亦都係不容錯過o既。Burano係一個以喱士製品聞名o既小島,居民將島上o既屋油成七彩顏色,紅橙黃綠青藍紫,加上運河同埋小橋,身處其中,真係以為自己去左童話世界,果然係“調色盤小島”。Murano就以玻璃制品聞名,島上有好多玻璃精品店同埋玻璃工房,可惜我地去到o既時候,d玻璃工房都冇開工,冇得睇d工匠即場吹玻璃,可能係因為假期o既關係啦。至於Lido,就係威尼斯影展o既舉行地點,亦係威尼斯少數有車行o既島,聽講島上面有個好靚o既沙灘,仲有好多好靚o既度假屋添!可惜時間唔夠,我地只可以o係船上面睇Lido島,如果下次再黎,一定要租番架車,然後o係度住一晚,游下水,享受一下啊!

威尼斯食野都好正架!“靠海食海”,黎到威尼斯,梗係要食海鮮啦!烤魚,烤墨魚,鯷魚醬伴玉米糕,墨魚汁意粉,雜錦海鮮意粉…真好味!仲要平均每人每餐都係大約€10-€15,勁抵食,搞到我而家都好掛住威尼斯添!




仲有就係,我o係威尼斯o既時候,有一朝無端端失眠,五六點就醒左,結果我就出左到影下相,發覺清晨o既威尼斯都好靚架: 冇左日間o既喧鬧,只有雀仔聲同埋晨霧,好舒服…

總括黎講,威尼斯實在係一個令人驚歎o既城市(可算係我去過最靚o既地方o既頭三名),可惜今次因為團友病左,所以玩得比較匆忙,未能細味威尼斯之美。不過唔緊要啦,遺憾永遠係旅遊經歷o既一部分,亦都俾我地一個“藉口”重遊威尼斯…Dear Venice, I will be back!!!

二人EXPENSE SUMMARY
住宿: B&B Casanova ai Tolentini,€110 * 2 = €220 (2 nights)
交通: 佛羅倫斯 -> 威尼斯(Eurostar):€30 * 2 = €60; 威尼斯(24 hr 水上巴士pass):€15 * 2 = €30
膳食: 午餐(2) ~€40; 晚餐(2) ~€60
參觀: 無
合共: ~€410

10/4 – 12/4 米蘭 (2 days)

Day 9 威尼斯 --(Intercity 1252/1555)--> 米蘭 (Lima站附近shopping)
Day 10 米蘭 (大教堂->名店街->聖西路球場->感恩聖母教堂)
Day 11 米蘭Bergamo Airport --(Ryan Air 1000/1100)--> 倫敦

一個完滿o既自遊行行程,點可以冇行街買野呢一part架!所以雖然米蘭係冇咩野旅遊點(得一個大教堂),但我都特別安排經米蘭返倫敦,咁樣個旅程至夠完滿架嘛!正所謂「o黎米蘭,老婆至贊成」!

為左慳$,我地今次揀左一間唔近Central Station,而係o係Lima地鐵站附近o既Hotel Serena, €58/night (由火車站去,的士費連行李費唔駛€5)。間酒店好近underground, 樓下好多買衫鋪頭,房間亦算新淨整潔,不過夜晚就成日有車聲,加上Hotel可能會有唔規矩o既人客入住,我就係俾隔離班黑鬼妹嘈到無覺好瞓,睇你好唔好彩啦。早餐係自助餐,款式多,一定夠食…總括黎講,勝在夠平啦!

大教堂係米蘭最值得一遊o既旅遊點,亦係我地o既第一個旅遊點。呢個有好多個尖頂o既大教堂同意大利其他o既大教堂真係好唔同,而入面果D好靚o既彩色玻璃畫亦都係其他意大利o既教堂冇o既。參觀完之後我地去左大教堂旁邊o既露天茶座一邊睇景一邊食lunch,pasta同埋pizza都好平,但係menu冇o既可樂竟然收我€6一杯,呃錢...

之後我地去左名店街,基本上米蘭o既名店都集中o係大教堂北面,基本上你諗到o既名店都有,不過由於團友話d款唔啱心水,所以竟然一滴血都冇流過(反而o係Lima站附近o既中價鋪頭shopping就有收獲)。而我亦o係大教堂背面搵到間足球精品店,裡面竟然有我偶像李安納度o既AC米蘭簽名戰衣,真開心。

米蘭之行o既最後兩站係聖西路球場(詳情請睇“聖西路球場遊記”)同埋感恩聖母教堂。感恩聖母教堂裡面有達文西“最後的晚餐”o既真跡,不過要入去就一定要預約(我三月尾上網預約,已經book到六月中)。如果預約唔到,就惟有walk-in博一博,然後望門輕歎啦…

最後,我地由Central Station左邊o既機場巴士站,坐巴士去Bergamo Airport (1hr 15min),坐超平o既Ryan Air返倫敦(€3.99 before surcharge),完成我地o既11天意大利之旅。

二人EXPENSE SUMMARY
住宿: Hotel Serena,€58 * 2 = €116 (2 nights)
交通: 威尼斯 -> 米蘭(Intercity):€24 * 2 = €48; 米蘭central station <-> Hotel(的士):€5 * 2 = €10; 市內巴士&電車 ~€10; 米蘭central station -> Bergamo Airport:€7 * 2 = €14
膳食: 午餐(2) ~€40; 晚餐(2) ~€50
參觀: 聖西路球場:€12.5 * 2 = €25
合共: ~€313

阿仙奴睇超聯篇 (Arsenal VS Bolton, 14/4/07)

呢場波係聯賽第四五位之爭o既重要賽事,如果輸左,除時冇歐聯踢,所以一定要支持。

我地大約o係12:30pm到達地鐵o既Arsenal站(3pm開波),地鐵內同埋Arsenal站已經有好多自己友。Arsenal站只有一個出口,一定唔會搞錯。出站後跟住人群轉右(以前去高貝利好似係轉左),沿路行就會見到一座紅綠色o既大樓,大樓地下有個Box office同埋一間叫"ALL ARSENAL"o既shop(呢間會賣Nike o既野,球場下面果間"THE ARMOURY"唔會賣)。o係Box office旁邊有條樓梯,上樓梯落天橋就見到Emirates Stadium啦!由地鐵站出口到紅綠色大樓之間有D臨時攤檔賣紀念品,好多款式連球會Shop都冇,D款仲靚D添!(佢地標明自己係official)

去到最緊要梗係買"牛牛"啦!我地o係紅綠色o既大樓地下Box office附近遇到第一個"牛牛",係個阿伯,每人￡125,仲話係premium seat,有free drinks添!因為我地實在無需要咁靚o既飛,所以決定再睇下先(事後至識得後悔…)。跟往再有兩三個中年"牛牛",全部都要每人￡150-￡200o既"天價"(我o既budget係每人￡100,而上次04年睇都只係￡70),所以決定過去另一邊(即係Holloway Road站)o既Box office附近睇下,點知可能因為呢邊好多警察,竟然無"牛牛"。我見時間尚早(1pm),所以決定入去"THE ARMOURY"買下野先,出黎再同D"牛牛"玩last minute。呢間鋪真係好大,比以前高貝利果間大4倍有多,不過D款就…唔掂囉…都唔知係邊鬼個design。
買左D野之後,已經係2pm,出黎再睇下,都仲唔見有牛牛,所以唯有過番Arsenal站附近睇下,個心開始有D急。Arsenal站呢邊果然有料到,不過幾個"牛牛"都係開D天價俾我,直到有個"牛牛"開每人￡120,再講下價,最後每人￡110成交,共￡220,大拿拿成HK$3300,都幾肉痛…算啦,人一世、物一世…(早之坐premium seat!!)

終於入場啦!我地今次坐J區第10行,禁區頂附近,由於個位太低,所以睇波唔係太清楚,加上全場都西斜,晒到嘔,所以都睇得幾辛苦。另外,由於個位o係保頓fans隔離,阿仙奴die hard fans就係正對角,所以氣氛無咁好,不過就可以成日見到兩面fans對罵,好攪笑!班友真係好攪野,互罵足足90分鐘真係好氣。

開波前,當然要介紹球員啦。阿記同其他球會唔同o既地方,係當介紹自己球員時,唔會講球員姓氏(例如介紹路斯基只講Tomas而唔講Rosicky),幾特別。

終於開波啦!雖然我地攻勢較多,但始終把握唔到…
11min: 竟然俾安歷卡攻入一球!保頓班友即刻唱晒歌,阿記球迷亦靜左一陣,但冇耐又幾續唱歌為球隊打氣。之後,保頓班友o係咁做“1:0”手勢挑釁我地…
31min: 路斯基挺身而出…1:1! 我地班擁躉即時生晒,振臂歡呼!
46min: 2:1! 法比打破入球荒! 真係興奮! 不過班球迷似乎未創作一個特別o既口號俾法比仔喎!(亨利係有特別口號o既)

81min: 艾雲甘寶攞紅牌! 我地D fans突然一齊企起身,一齊攞張紅牌出黎向保頓球迷示威,勁攪笑!
90min: 終於完場,2:1,順利勝出,球員向球迷鼓掌致意。歐聯o既席位十拿九穩。

總結: 阿聯酋主場好新好靚,但你論氣氛,似乎高貝利略勝一籌(可能係因為突然間多左22000個新球迷,打氣未係咁well organized,加上高貝利“場仔”d聲音比較集中),不過能夠o係主場支持阿仙奴,加上係重要賽事,仲要最後贏波,又真係幾難忘o既。

羅馬睇歐聯篇(Roma VS MU, 4/4/07)

我地由波波洛廣場附近坐2號電車去尾站Piazza Mancini,由於又搵唔到地方買車飛,所以…。雖然只係開賽前兩個幾鐘,但架車已經極之擠迫,但D人又繼續上到車喎。(唔想咁樣,可以o係Termini總站坐910號巴士,尾站一樣係Piazza Mancini,舒服好多)

落車後,跟人群行過橋,大約10分鐘就到Olympic Stadium門口。過橋時突然聽到嘭嘭聲,對岸遠處好似有差佬放催淚彈,有D人散開(應該係曼狗攪事),好激!我地睇定D至行過去,一D事都冇。
一去到無耐就有本地人問我地要唔要飛,€300兩張,仲俾D飛我地睇。因為我驚張飛係假野(我未見過歐聯o既飛),想睇下其他人D飛咩野樣先,所以就推左。條友一路跟住我地,"270…250…",就同你博一鋪啦!(€125一張飛,budget之內。)
成交之後我個心好驚,驚買左假飛,大拿拿二千五喎!(最攪笑係買完至記得睇下原價,原來係€50o既靚位。)跟住仲見到有幾個球迷互相追打,好驚!

心情平伏D之後,我就去沿途見到果D多紀念品攤檔買野。我地買左一條Roma頸巾同一頂Roma冷帽(€10 each),都係表露身份安全D。跟住再o係外賣車買野食,又凍又貴,早知一早買定。(其實場裡面都有得賣,笨左!)

終於入閘啦,查飛係電子check飛上面o既barcode,不經人手,真飛就綠色"V",假飛就紅色"X"。個心扑扑跳,"綠色、綠色、綠色…YES!",真係好興奮!不過security check時要將所有膠樽撙蓋沒收(可能係驚D人拋入場),但入場後D膠樽飲品又連蓋賣,真奇怪。入場時都見到好多人一家大細睇波,其實都好安全o既。


終於步入球場,嘩!好大呀!有八萬三千個位喎。我地o既位o係第24行(上半部分o既第一行),近角球旗位置,前面係行人通道,無遮無擋,係靚位黎架!旁邊龍門後o既區域就係羅馬死硬球迷o既區域,所以氣氛極好。而曼聯球迷o既作客球迷區就o係正我地對角位,所以十分安全。不過呢個場o既缺點就係比較污糟,好多垃圾;加上有田徑跑道,所以睇波o既感覺比較遠。

開波前約45分鐘雙方球員熱身,之後就介紹正選同後備球員,一介紹曼聯球員全場就噓到七彩,曼聯D球迷一唱歌亦噓到佢地收聲為止,連大會o既英文Announcement都照噓(逢英必反!),真係爽!而介紹羅馬球員時球迷當然熱烈歡呼,介紹"羅馬王子"托迪o既時候更加係掌聲震天!跟住就係唱羅馬會歌,全場球迷舉起banner,舞動大旗,氣氛一流!

終於開波啦!球迷全場不停唱歌,羅馬一有攻勢就全場一齊打氣,曼聯一有失誤就全場一齊噓!羅馬入波就更加high到爆啦!歡呼聲真係嘈到拆天,全場起身晒舉banner,舞大旗,互相擁抱(最衰旁邊冇靚鬼妹)。曼聯入波就…全場鵪鶉囉!最後羅馬贏2:1,主場都好high!而我地亦都渡過左一個興奮o既晚上,呢二千五蚊真係抵!現場睇歐聯,此刻無價!